પાકિસ્તાની ક્રિકેટ ટીમ હાલમાં દક્ષિણ આફ્રિકાના પ્રવાસે T20 શ્રેણી રમી રહી છે. હવે આ દરમિયાન પાકિસ્તાનના ફાસ્ટ બોલર મોહમ્મદ આમિરે સંન્યાસ લેવાનો નિર્ણય લીધો છે. તેણે આ માહિતી સોશિયલ મીડિયા પ્લેટફોર્મ X પર આપી છે. આમિરે બીજી વખત આંતરરાષ્ટ્રીય ક્રિકેટમાંથી નિવૃત્તિ લીધી છે. અગાઉ તેણે 2020માં નિવૃત્તિની જાહેરાત કરી હતી.
આમિરે બીજી વખત નિવૃત્તિ લીધી
મોહમ્મદ આમિરે સોશિયલ મીડિયા પ્લેટફોર્મ પર પોસ્ટ કર્યું પાકિસ્તાન માટે રમવું ખૂબ જ ગર્વની વાત છે. હું પીસીબીનો આભાર માનું છું કે તે વર્ષોથી હંમેશા જરૂરી સપોર્ટ પૂરો પાડે છે. હું ટીમનું સારું પ્રદર્શન જોવા માટે ઉત્સુક છું. હું પાકિસ્તાનના ચાહકોનો પણ આભાર માનું છું, જેમણે મારી કારકિર્દી દરમિયાન હંમેશા મને સપોર્ટ કર્યો છે.
T20 વર્લ્ડ કપનો ખિતાબ જીત્યો છે
મોહમ્મદ આમિરે પાકિસ્તાન ક્રિકેટ ટીમ માટે ત્રણેય ફોર્મેટમાં ક્રિકેટ રમી છે. આ સિવાય તે T20 વર્લ્ડ કપ 2009નો ખિતાબ જીતનાર પાકિસ્તાની ટીમનો પણ સભ્ય રહી ચૂક્યો છે. તેણે ફાઇનલમાં શ્રીલંકા સામે ચાર ઓવરમાં 30 રન આપીને એક વિકેટ લીધી હતી. આ પછી, વર્ષ 2010 માં, તે ફિક્સિંગમાં દોષી સાબિત થયો હતો. ત્યારબાદ તેના પર પાંચ વર્ષનો પ્રતિબંધ મુકવામાં આવ્યો હતો. પરંતુ તે ફરીથી આંતરરાષ્ટ્રીય ક્રિકેટમાં પાછો ફર્યો અને જોરદાર પ્રદર્શન કર્યું.
T20 વર્લ્ડ કપ રમવા માટે નિવૃત્તિ બાદ વાપસી કરી હતી
મોહમ્મદ આમિર ટી20 વર્લ્ડ કપ 2024માં પાકિસ્તાની ટીમ માટે રમવા માટે નિવૃત્તિમાંથી પાછો ફર્યો હતો. પરંતુ તે સારું પ્રદર્શન કરી શક્યો ન હતો અને જબરજસ્ત ફ્લોપ સાબિત થયો હતો. આ પછી પાકિસ્તાની ટીમ પણ ગ્રુપ સ્ટેજમાંથી બહાર થઈ ગઈ હતી. અત્યાર સુધીમાં તેણે 36 ટેસ્ટ મેચમાં 119 વિકેટ, 61 ODI મેચમાં 81 વિકેટ અને 62 T20 ઈન્ટરનેશનલ મેચોમાં 71 વિકેટ ઝડપી છે.
