એલેક્સા એક્સપીરિયન્સ એન્ડ ડિવાઇસિઝના ઇન્ડિયા કંટ્રી મેનેજર પુનીષ કુમારના જણાવ્યા મુજબ ભારતીય યુઝર્સ પ્રત્યેક સપ્તાહમાં એલેક્સા સાથે 10 કરોડથી વધુ વાર વાત કરે છે. આ આંકડો અમેરિકા અને બ્રિટન કરતા પણ વધારે છે. ભારતીયો માટે એલેક્સાની સૌથી મોટી ખાસિયત એ છે કે તે હવે હિંદી ભાષાને પણ સપોર્ટ કરે છે. જોકે એલેક્સા સાથે વાતચીત દરમિયાન ભારતીયો ઘણા અજીબોગરીબ સવાલ કરે છે તો કેટલાક ફ્લર્ટ પણ કરે છે.
મજાની વાત તો એ છે કે ભારતીય યુઝર્સ એલેક્સા સાથે ફ્લર્ટ કરવાની જગ્યાએ પ્રતિ મિનિટ 4 વાર તેની પાસે હનુમાન ચાલીસા પ્લે કરવા માટે કહે છે. તો હનુમાન ચાલીસા ઉપરાંત એલેક્સાને પ્રતિ મિનિટ ત્રણવાર બેબી શાર્ક પ્લે કરવા માટે કહેવામાં આવે છે. આ આંકડા વર્ષ 2019ના છે.
ભારતીય યુઝર્સ પ્રત્યેક બે મિનિટે એલેક્સાને લગ્નની પ્રપોઝલ મુકે છે. તો પ્રત્યેક એક મિનિટમાં લોકો 11 વાર એલેક્સાને ‘હાઉ આર યુ’ પૂછીને તેના હાલચાલ જાણવા માગે છે. એલેક્સા યુસેજના ડેટાના આધારે કહેવામાં આવ્યું કે એલેક્સા પ્રતિ મિનિટ 1000 કરતા વધારે ગીતો પ્લે કરે છે. મ્યુઝિક અને સ્પોર્ટ્સ અપડેટ ઉપરાંત આ સ્માર્ટ સ્પીકર પાસેથી પ્રતિ મિનિટ 10 વાર જનાવરોના અવાજ કાઢવા માટે કહેવામાં આવ્યું છે. તો કેટલાક સવાલો તો એલેક્સાને પણ ચકરાવે ચડાવે તેવા પૂછવામાં આવે છે.
એલેક્સા પ્રતિ મિનિટ ફેક્ટ સાથે જોડાયેલા 50 સવાલોના જવાબ આપે છે. યુઝર્સ એલેક્સા પાસેથી બીજી જાણકારીઓ પણ લે છે. જેમ કે કોઈ પૂછે છે.. ‘પાણી ભીનું કેમ હોય છે’ ‘આકાશ વાદળી કેમ હોય છે’ જેવા સવાલો શામેલ છે. જ્યારે યુઝર્સના ખાવાના શોખને પણ એલેક્સા પૂરા કરે છે. દરરોજ એલેક્સાને ખાવાની જુદી જુદી ડિશ અંગે 1000 સવાલ પૂછવામાં આવે છે અને એલેક્સા તેની માહિતી આપે છે. તેમજ હિંદી ભાષાના સપોર્ટ બાદ એલેક્સા પ્રતિ મિનિટ એક હિંદી વાર્તા પણ સંભળાવે છે.
