અત્યાર સુધીમાં દેશભરના 11 કરોડથી વધુ ખેડૂતોને 2.42 લાખ કરોડ રૂપિયાથી વધુનો લાભ આપવામાં આવ્યો છે.
ગુરુવારે દેશભરના લગભગ 8.5 કરોડ ખેડૂતોને સારા સમાચાર મળવાના છે. વડા પ્રધાન નરેન્દ્ર મોદી ગુરુવારે PM-કિસાન સન્માન નિધિ યોજના હેઠળ આશરે 8.5 કરોડ ખેડૂત લાભાર્થીઓને 14મા હપ્તા તરીકે લગભગ 17,000 કરોડ રૂપિયા રિલીઝ કરશે. આ રકમ ગુરુવારે રાજસ્થાનના સીકરમાં એક કાર્યક્રમમાં લાભાર્થીઓના બેંક ખાતામાં ટ્રાન્સફર કરવામાં આવશે, એમ એક સત્તાવાર નિવેદનમાં જણાવાયું છે.
યોજનાની શરૂઆતથી લાભાર્થીઓને ટ્રાન્સફર કરવામાં આવેલી કુલ રકમ રૂ. 2.59 લાખ કરોડને પાર થવાની ધારણા છે. આ નાણાકીય સહાય ખેડૂતોને તેમની દૈનિક જરૂરિયાતો પૂરી કરવામાં મદદ કરશે અને તેમના એકંદર કલ્યાણમાં યોગદાન આપશે, એમ નિવેદનમાં જણાવાયું છે.
2019 માં શરૂ
પ્રધાનમંત્રી કિસાન સન્માન નિધિ (PM-કિસાન) એ 24 ફેબ્રુઆરી, 2019ના રોજ શરૂ કરવામાં આવેલી અને ડિસેમ્બર 2018થી અમલી બનેલી કેન્દ્રીય યોજના છે. યોજના હેઠળ, ડાયરેક્ટ બેનિફિટ ટ્રાન્સફર (DBT) મોડ દ્વારા દેશભરના ખેડૂત પરિવારોના બેંક ખાતામાં ત્રણ સમાન હપ્તામાં દર વર્ષે રૂ. 6,000નો નાણાકીય લાભ ટ્રાન્સફર કરવામાં આવે છે. અત્યાર સુધીમાં દેશભરના 11 કરોડથી વધુ ખેડૂતોને 2.42 લાખ કરોડ રૂપિયાથી વધુનો લાભ આપવામાં આવ્યો છે.
PM કિસાન સમૃદ્ધિ કેન્દ્રની ભેટ
આ કાર્યક્રમમાં મોદી 1.25 લાખ PM કિસાન સમૃદ્ધિ કેન્દ્ર (PMKSK) દેશને સમર્પિત કરશે. સરકાર તબક્કાવાર રીતે દેશમાં રિટેલ ખાતરની દુકાનોને PMKSK માં રૂપાંતરિત કરી રહી છે. આ PMKSK ખેડૂતોને એગ્રી-ઇનપુટ્સ, માટી, બિયારણ અને ખાતર માટે પરીક્ષણ સુવિધાઓ પૂરી પાડશે. આ કેન્દ્રો ખેડૂતોમાં જાગૃતિ ફેલાવશે, વિવિધ સરકારી યોજનાઓ વિશે માહિતી પ્રદાન કરશે અને બ્લોક અને જિલ્લા સ્તરના આઉટલેટ્સ પર રિટેલરોની નિયમિત ક્ષમતા નિર્માણની ખાતરી કરશે.
પીએમ મોદી યુરિયા ગોલ્ડ લોન્ચ કરશે
આ કાર્યક્રમમાં ખેડૂતોને વધુ એક મોટી ભેટ મળવા જઈ રહી છે. વડાપ્રધાન મોદી આવતીકાલના કાર્યક્રમમાં સલ્ફર કોટેડ યુરિયા (યુરિયા ગોલ્ડ) લોન્ચ કરશે. આ સાથે પીએમ મોદી ONDC પર 1,600 ખેડૂત ઉત્પાદક સંગઠનોના ઓનબોર્ડિંગને પણ લોન્ચ કરશે.
