રાજ્યમાં મેઘરાજાની મહેરબાની છે. ત્યારે આજે રાજ્યના અનેક વિસ્તારોમાં ધોધમાર વરસાદ વરસ્યો હતો. ખાસ કરીને સૌરાષ્ટ્રમાં મેઘરાજાએ પોતાની ધમાકેદાર બેટિંગ શરૂ કરી દીધી છે આવામાં નદીઓમાં પૂર આવી રહ્યા છે. અનેક નદીઓ બે કાંઠે વહેતી થઈ છે. જો કે મેઘ મહેરથી ખેડૂતોમાં આનંદની લાગણી છવાઇ ગઇ છે.બીજી તરફ હવામાન વિભાગે આગામી 4 દિવસ રાજ્યમાં વરસાદની આગાહી કરી છે.
રાજ્યના ખેડૂતો માટે ખુશીના સમાચાર છે. આગામી દિવસોમાં રાજ્યમાં વરસાદી માહોલ રહેશે. રાજ્યમાં આગામી 4 દિવસ વરસાદની આગાહી કરવામાં આવી છે. 15 જુલાઇના નવસારી, વલસાડ, દમણ, દાદરા નગરહવેલી, જૂનાગઢ અને ગીર સોમનાથમાં ભારે વરસાદની આગાહી કરવામાં આવી છે. રાજ્યમાં વરસાદને લઇને હવામાન વિભાગે આગાહી કરી છે.
હવામાન વિભાગે કહ્યું કે આગામી 16 અને 17 જુલાઈએ ભારે વરસાદ પડી શકે છે. દ.ગુજરાત અને સૌરાષ્ટ્ર-કચ્છમાં અતિ ભારે વરસાદની આગાહી કરવામાં આવી છે. નવસારી, વલસાડ, સુરત, તાપી અને ડાંગમાં ભારે વરસાદ પડી શકે છે. આ ઉપરાંત અમરેલી, ભાવનગર, ગીર સોમનાથ, દિવ, જૂનાગઢ અને કચ્છમાં પણ ભારે વરસાદની આગાહી કરાઇ છે. સાથે જ આગામી 2 દિવસ માછીમારોને દરિયો ન ખેડવા સૂચના અપાઇ છે. અમદાવાદમાં હળવાથી મધ્યમ વરસાદ પડી શકે છે.
