ઋષિ કપૂર 30 એપ્રિલે આ દુનિયાને છોડીને જતા રહ્યા. ઋષિ કપૂરના નિધન બાદ તેમની પત્ની નીતૂ કપૂર તે દરેક વ્યક્તિનો આભાર માની રહી છે, જેમણે મુશ્કેલીના સમયમાં તેમના પરિવારને સપોર્ટ આપ્યો.
નીતૂ કપૂરે હાલમાં મુકેશ અંબાણી અને નીતા અંબાણી સાથેની તસવીર શેર કરતાં લખ્યું છે કે, ‘અમારા માટે એક પરિવાર તરીકે 2 વર્ષની જર્ની ખૂબ લાંબી રહી. કેટલાક દિવસો સારા હતા અને કેટલાક દિવસો ખરાબ પણ હતા. પરંતુ આ સફર અંબાણી પરિવારના પ્રેમ અને સપોર્ટ વગર ન થઈ શકત. છેલ્લા કેટલાક દિવસથી હું આ પરિવારનો આભાર વ્યક્ત કરવા માટે શબ્દો શોધી રહી હતી, જેમણે ઘણી વખત ઘણી રીતે અમને સાથ આપ્યો’.
તેમણે લખ્યું છે કે, ‘છેલ્લા 7 મહિનાથી પરિવારનો દરેક સભ્ય તે જ પ્રયાસ કરતો હતો કે ઋષિ અને મને કોઈ તકલીફ ન થાય. તેમણે અમારું ખૂબ ધ્યાન રાખ્યું. તેઓ હોસ્પિટલ મળવા આવતા હતા અને ઋષિને ખૂબ અટેન્શન આપતા હતા. તેમણે તે સમયે અમને ટેકો આપ્યો જ્યારે અમે ખૂબ ડરેલા હતા’.
અંબાણી પરિવારના દરેક સભ્યનું નામ લખીને નીતૂએ લખ્યું કે, ‘મુકેશભાઈ, નીતા ભાભી, આકાશ, શ્લોકા, અનંત અને ઈશા તમે દરેક અમારી સાથે એક ગાર્ડિયન એન્જલ તરીકે સાથે રહ્યા. અમે તમામ તમારા માટે શું અનુભવી રહ્યા છીએ તે વિશે જાણી શકતા નથી. અમે તમારો દિલથી આભાર માનીએ છીએ. અમે નસીબદાર છીએ કે તમે અમારી સાથે છે. મારા, રણબીર, રિદ્ધિમા અને પૂરા કપૂર પરિવાર તરફથી તમારો આભાર’.
