વડાપ્રધાન નરેન્દ્ર મોદીએ દેશમાં 21 દિવસનું લોકડાઉન જાહેર કર્યું તેના થોડા દિવસ પહેલા જ અજય દેવગણની પત્ની કાજોલ અને દીકરી ન્યાસા સિંગાપોરથી આવ્યા હતા. ન્યાસા સિંગાપોરમાં અભ્યાસ કરે છે. કાજોલ અને ન્યાસાની એરપોર્ટ પરની તસવીરો વાયરલ થઈ હતી. આ સમાચાર સોશિયલ મીડિયા પર આગની જેમ ફેલાઈ ગયા. ત્યારે અમુક મીડિયા પોર્ટલ્સ પર એવા અહેવાલો વહેતા થયા હતા કે ન્યાસા અને કાજોલમાં કોરોના વાયરસના લક્ષણો જોવા મળ્યા છે. પરિણામે તેમને હોસ્પિટલ લઈ જવાયા છે. ત્યારે આ સમયે અજય દેવગણે ખુદ આ તમામ અફવાઓ પર પ્રતિક્રિયા આપી છે. તેમણે આ મામલે એક ટ્વીટ કરીને સત્ય હકીકત જણાવી છે.
અજય દેવગણે ટ્વિટ કરીને લખ્યું, “આટલી ચિંતા કરવા માટે આભાર. કાજોલ અને ન્યાસા એકદમ સ્વસ્થ છે. તેમની તબિયતને લઈને જે અફવાઓ ફેલાવાઈ છે તે પાયાવિહોણી છે.” મહત્વનું છે બાકીના સેલેબ્સ અને દેશવાસીઓની જેમ અજય પણ પોતાના પરિવાર સાથે ક્વોરન્ટીનમાં સમય વિતાવી રહ્યો છે. ભારતના સૌથી વધુ સંક્રમિત શહેરોમાં મુંબઈનો સમાવેશ થાય છે. ત્યારે તમામ ફિલ્મી સિતારાઓ હાલ પોતપોતાના ઘરમાં બંધ છે. હાલ કોઈ ફિલ્મનું શૂટિંગ ચાલતું નથી.
Thank you for asking. Kajol & Nysa are absolutely fine. The rumour around their health is unfounded, untrue & baseless?
— Ajay Devgn (@ajaydevgn) March 30, 2020
દુનિયાભરમાં હજારો લોકોને કોરોના વાયરસ ભરખી ગયો છે અને લાખો લોકો સંક્રમિત થયા છે. ભારતમાં પણ કોરોનાના દર્દીઓની સંખ્યા વધી રહી છે. ત્યારે કોરોના વાયરસના ફેલાવાને રોકવા દેશમાં લોકડાઉન જાહેર કરવામાં આવ્યું છે.
