એર કંડિશનર, એર પ્યુરીફાયર અને વોટર કુલર બનાવતી કંપની બ્લુ સ્ટારના શેરમાં બુધવારે જબરદસ્ત ઉછાળો જોવા મળ્યો છે. બોમ્બે સ્ટોક એક્સચેન્જમાં 15%ના ઉછાળા સાથે બ્લુ સ્ટારના શેર રૂ. 920 પર પહોંચી ગયા છે. બુધવારે કંપનીના શેરોએ પણ 52 સપ્તાહની નવી ઊંચી સપાટી બનાવી છે. બ્લુ સ્ટારે નાણાં એકત્ર કરવા માટે ક્વોલિફાઇડ ઇન્સ્ટિટ્યૂશનલ પ્લેસમેન્ટ (QIP) ઇશ્યૂ શરૂ કર્યો છે. બ્લુ સ્ટારના શેરનું 52 સપ્તાહનું નીચલું સ્તર રૂ. 521 છે.
QIPની ફ્લોર પ્રાઇસ 784.55 રૂપિયા છે
બ્લુ સ્ટારના ક્વોલિફાઇડ ઇન્સ્ટિટ્યૂશનલ પ્લેસમેન્ટ (QIP) ઇશ્યૂની ફ્લોર પ્રાઇસ રૂ. 784.55 છે, જે સોમવારના રૂ. 800.05ના બંધ ભાવથી 2% ડિસ્કાઉન્ટ છે. કંપનીની એક્ઝિક્યુટિવ મેનેજમેન્ટ કમિટીની હવે 22 સપ્ટેમ્બરે બેઠક મળી રહી છે, જેમાં QIPની ઈશ્યુ પ્રાઈસ પર વિચાર કરવામાં આવશે. કન્ઝ્યુમર ડ્યુરેબલ્સ કંપનીના બોર્ડે એપ્રિલ-જૂન ક્વાર્ટરના પરિણામો દરમિયાન QIP દ્વારા રૂ. 1000 કરોડ સુધી એકત્ર કરવાના પ્રસ્તાવને મંજૂરી આપી હતી.
ફંડનો ઉપયોગ વિકાસ યોજના અને દેવું ઘટાડવા માટે કરવામાં આવશે
બ્લુ સ્ટાર એકત્ર કરાયેલ ભંડોળનો ઉપયોગ તેની વૃદ્ધિ યોજનાઓને આગળ ધપાવવા માટે કરશે. કંપની તેના દેવું ઘટાડવા માટે ભંડોળના અમુક ભાગનો ઉપયોગ કરશે. બ્લુ સ્ટારના વાઇસ ચેરમેન અને મેનેજિંગ ડિરેક્ટર વીર અડવાણીએ તાજેતરમાં CNBC-TV18ને આપેલા એક ઇન્ટરવ્યુમાં કહ્યું હતું કે, ‘અમે એકત્ર કરાયેલા ભંડોળના અમુક ભાગનો ઉપયોગ દેવું ઘટાડવા માટે કરીશું. ભંડોળનો મોટો હિસ્સો અમારી શ્રી સિટી પ્લાનમાં ઉપયોગમાં લેવાશે, જેમાંથી પ્રથમ તબક્કો ફરી શરૂ થયો છે. તેનો બીજો તબક્કો માર્ચ 2024 સુધીમાં શરૂ થશે. તેમણે એમ પણ કહ્યું કે કંપની નાણાકીય વર્ષ 2024માં ડબલ ડિજિટ ગ્રોથનો લક્ષ્યાંક ધરાવે છે.
