મલેશિયામાં રમાઈ રહેલા ICC T20 વર્લ્ડ કપ એશિયા ક્વોલિફાયર Bમાં 30 જુલાઈના રોજ બે મેચ રમાઈ હતી. ચીન 50 હેઠળની સતત ત્રીજી મેચમાં ઓલઆઉટ થયું હતું અને ભૂટાને તેને 95 રનથી હરાવ્યું હતું. મલેશિયાની ટીમે એકતરફી મેચમાં મ્યાનમારને 184 રનના વિશાળ અંતરથી હરાવ્યું હતું. આ પહેલા 28 જુલાઈએ રમાયેલી મેચમાં થાઈલેન્ડે મ્યાનમારને 101 રનથી ખરાબ રીતે હરાવ્યું હતું.
ટોસ જીતીને પ્રથમ બેટિંગ કરતા ભૂટાને 20 ઓવરમાં 161/4 રન બનાવ્યા હતા, જવાબમાં ચીનને વરસાદના કારણે 17 ઓવરમાં 144 રનનો લક્ષ્યાંક આપવામાં આવ્યો હતો પરંતુ તેની આખી ટીમ 11.4 ઓવરમાં માત્ર 48 રનમાં જ ઓલઆઉટ થઈ ગઈ હતી. ભૂટાનના કેપ્ટન સુપ્રીત પ્રધાનને 41 બોલમાં 59 રનની ઈનિંગ માટે પ્લેયર ઓફ ધ મેચ જાહેર કરવામાં આવ્યો હતો. તેના સિવાય ઓપનર તેનઝિંગ રાબગેએ પણ 50 રનની ઇનિંગ રમી હતી. બોલિંગમાં ભુતાન તરફથી નામગે થિનલી અને તાશી ફુંટશોએ ત્રણ-ત્રણ વિકેટ ઝડપી હતી.
ટૂર્નામેન્ટની સાતમી મેચમાં મલેશિયાએ 20 ઓવરમાં 6 વિકેટે 219 રન બનાવ્યા હતા જેના જવાબમાં મ્યાનમારની ટીમ 15.5 ઓવરમાં માત્ર 35 રનમાં ઓલઆઉટ થઈ ગઈ હતી. મલેશિયાના કેપ્ટન અહેમદ ફૈઝને 50 બોલમાં 105 રનની શાનદાર સદી માટે પ્લેયર ઓફ ધ મેચ જાહેર કરવામાં આવ્યો હતો.
આ પહેલા 28 જુલાઈએ ટૂર્નામેન્ટની પાંચમી મેચમાં થાઈલેન્ડે 20 ઓવરમાં 6 વિકેટે 140 રન બનાવ્યા હતા, જેના જવાબમાં મ્યાનમારની ટીમ 16 ઓવરમાં માત્ર 39 રનમાં જ ઓલઆઉટ થઈ ગઈ હતી. થાઈલેન્ડના જાન્દ્રે કોએત્ઝીને 29 બોલમાં 40 રનની ઈનિંગ ઉપરાંત એક પણ રન આપ્યા વિના બે વિકેટ લેવા બદલ પ્લેયર ઓફ ધ મેચ તરીકે પસંદ કરવામાં આવ્યો હતો.
ICC T20 વર્લ્ડ કપ એશિયા ક્વોલિફાયર Bમાં 31 જુલાઈએ ભૂતાન થાઈલેન્ડ અને ચીનનો મુકાબલો મ્યાનમાર સામે થશે. યજમાન મલેશિયા 1 ઓગસ્ટે ફાઈનલ મેચમાં થાઈલેન્ડ સામે ટકરાશે, જે ટુર્નામેન્ટના વિજેતાનો નિર્ણય કરશે અને તે ટીમ નેપાળમાં 1 થી 10 નવેમ્બર દરમિયાન યોજાનારી ICC T20 વર્લ્ડ કપ એશિયા રિજનલ ફાઈનલમાં રમશે.
The post T20માં ચીનનું ચોંકાવનારું શરમજનક પ્રદર્શન ચાલુ, સતત ત્રીજી મેચમાં 50ની અંદર ઓલઆઉટ appeared first on Ramat Jagat.