રજનીકાંત અને ઐશ્વર્યા રાયની જોડીએ રોબો ફિલ્મમાં ધૂમ મચાવી હતી. હવે આ બંને સ્ટાર થલાઈવર 169 નામની ફિલ્મમાં ફરી સ્ક્રીન પર સાથે દેખાશે. રોબોમાં ઐશ્વર્યાએ વિજ્ઞાની રજનીકાંતની મેડિકલ સ્ટુડન્ટ પ્રેયસીની ભૂમિકા ભજવી હતી. બંનેની કેમિસ્ટ્રીને લોકોએ ખાસ પસંદ કરી હતી. 12 વર્ષ પછી આ બંને સ્ટાર ફરી સાથે આવી રહ્યાં છે. થલાઈવર 169 ફિલ્મમાં ઐશ્વર્યાને રજનીકાંતની પત્નીની ભૂમિકા માટે કરારબદ્ધ કરાવમાં આવી છે. જોકે, આ અંગે હજુ સત્તાવાર ઘોષણા થઈ નથી.
ઐશ્વર્યાનો તમિલ ફિલ્મો સાથે ખાસ નાતો છે. તેની પહેલી ફિલ્મ મણિરત્નમે દિગ્દર્શિત કરેલી ઈરુવર હતી. એ પછી હિંદીમાં પણ ડબ થયેલી મૂળ તમિલ ફિલ્મ જિન્સ તેની કમર્શિઅલ સકસેસ મેળવનારી પહેલી ફિલ્મ બની હતી.
આ ફિલ્મના અન્ય કલાકારોમાં રામ્યા મોહન અને પ્રિયંકા અરૂલ મોહનનો પણ સમાવેશ થાય છે. ફિલ્મ મોટાભાગે આવતાં વર્ષે રિલીઝ થશે. ઐશ્વર્યાની પોનિયિન સેલ્વમ ફિલ્મની રાહ જોવાઈ રહી છે. મણિરત્નમની આ ફિલ્મનું શૂટિંગ પૂર્ણ થઈ ચૂક્યું છે.
