ફિલ્મ ‘એક હસીના થી એક દીવાના થા’ને યુટ્યુબ પર કોઈપણ અધિકાર વિના લાખો વ્યુઝ મળ્યા પછી ફિલ્મના નિર્માતા સુનીલ દર્શન ખૂબ જ નારાજ છે. પહેલા તો તેમણે ગૂગલને સત્તાવાર રીતે ફરિયાદ કરીને તેને રોકવા માટે અપીલ કરી હતી, પણ જ્યારે ગૂગલ તરફથી કોઈ પગલાં લેવામાં ન આવ્યા, ત્યારે તેમણે કાનૂની લડાઈ લડવાનો ઉત્તમ નિર્ણય લીધો છે.
તેઓ આ કાયદાકીય લડાઈ તરફના પ્રથમ પગલામાં જીતી ગયા છે, કારણ કે કોર્ટના આદેશ પર ગૂગલ અને તેના સીઈઓ અને કર્મચારીઓ વિરુદ્ધ એફઆઈઆર નોંધવામાં આવી છે.
ફિલ્મ નિર્માતા સુનિલ દર્શને આરોપ લગાવ્યો છે કે, વીડિયો પ્લેટફોર્મ પર ઘણા યુઝર્સ તેમની વિશિષ્ટ સામગ્રીનું મુદ્રીકરણ કરી રહ્યા છે, જેના કારણે તેમને ખૂબ જ મોટું નુકસાન થઈ રહ્યું છે, ત્યાર પછી તેમણે યુટ્યુબ પર તેમની ફિલ્મ ‘એક હસીના થી એક દીવાના થા’ના કોપીરાઈટના ઉલ્લંઘનને રોકવા માટે કાનૂની માર્ગ અપનાવ્યો. ફિલ્મ નિર્માતા સુનિલ દર્શને તેમને એફઆઇઆરમાં Google CEO સુંદર પિચાઈ અને તેમના કેટલાક કર્મચારીઓના નામ આપ્યા છે.
સુનીલ દર્શને ETimes સાથેની વાતચીત દરમિયાન જણાવ્યું કે, ‘મારી ફિલ્મ, જે મેં ક્યાંય પ્રસારિત કરી નથી અને દુનિયામાં કોઈને વેચી નથી, તે યુટ્યુબ પર લાખો વખત જોવામાં આવી છે. હું ગુગલને તેને દૂર કરવા વિનંતી કરતો રહ્યો, પણ વિક્ષેપ સિવાય કંઈ મળ્યું નહીં. હું ખૂબ જ નિરાશ થઈ ગયો. મારી પાસે કોઈ વિકલ્પ નહોતો અને અંતે મારે કોર્ટમાં જવું જ પડ્યું.
ફિલ્મ નિર્માતા સુનિલ દર્શને કહ્યું કે, “સદનસીબે, કોર્ટે મારી તરફેણમાં આદેશ આપ્યો અને પોલીસને એફઆઈઆર નોંધવાનો નિર્દેશ આપ્યો. એક અબજથી વધુ ઉલ્લંઘનો છે અને મારી પાસે તેમાંથી દરેકનો રેકોર્ડ છે. તે એવા લોકો વિશે છે, જેઓ દાવો કરે છે કે તેઓ કાયદાનું પાલન કરે છે. સુનિલ દર્શન ટેક્નોલોજીના ગેરફાયદા વિશે કહે છે, ‘જે લોકો મારા વીડિયોથી કમાણી કરે છે તેમને ફાયદો થાય છે. હું ટેક્નોલોજીને પડકારી રહ્યો નથી, પણ હું તેનો જે દુરુપયોગ થઈ રહ્યો છે એ દર્શાવવા માંગુ છું.
