દેશમાં કોવિડ-19 જેવી મોટી મહામારી સામેની લડાઇમાં પ્રથમ હરોળમાં રહીને લડી રહેલા યોદ્ધાઓને આજે દેશની સેના દ્વારા અનોખી રીતે સન્માન આપવામાં આવી રહ્યું છે. ભારતીય વાયુસેનાએ સુખોઇ જેવા લડાખૂ વિમાન દ્વારા દેસના અલગ-અલગ ભાગમાં સ્થિત કોરોના વાયર હોસ્પિટલો ઉપર ફુલ વરસાવી અભિવાદન કર્યું છે. જ્યારે બીજી તરફ નૌસેના પોતાના જહાજોને શણગારતા કોરોના સામેની લડાઇમાં જીત મેળવવાનો સંદેશ આપશે.
કોરોનાના કર્મવીરોને આજે સરહદના શૂરવીર સલામી પેશ કરી રહ્યાં છે. સેનાના ત્રણેય પાંખના જવાન કોરોનાને હરાવા માટે જોડાયેલા ડોકટર, નર્સ અને મેડીકલ સ્ટાફ, સફાઇ કર્મી અને બીજી ફ્રંટલાઇનના યોદ્ધાઓ પ્રતિ આભાર વ્યક્ત કરી તેના પર પૂષ્પવર્ષા કરી રહ્યાં છે.
એશિયાની સૌથી મોટી ગણાતી અમદાવાદ સિવિલ હોસ્પિટલ તથા એસ.વી.પી હોસ્પીટલ ઉપર પણ આજે સવારે ભારતીય વાયુસેનાના લડાકુ વિમાનોએ પુષ્પ પાંખડીઓ વરસાવીને કોરોના વોરિયર્સની સેવાને બિરદાવી હતી. ઉલ્લેખનીય છે કે, અમદાવાદની સિવિલ હોસ્પિટલ પરિસરમાં 1200 બેડની કોવિડ હોસ્પિટલમાં તથા એસવીપી હોસ્પિટલ માં કોરોના વાઈરસના અનેક દર્દીઓનો ઈલાજ કરાઈ રહ્યો છે. આ દર્દીઓની સેવા સુશ્રુષા માટે અનેક તબીબો, નર્સિંગ સ્ટાફ, પેરામેડિકલ સ્ટાફ અને સેવકો છેલ્લા કેટલાય દિવસોથી કાર્યરત છે.
ત્યારે તેમની આ સેવાના સન્માન રૂપે ભારતીય વાયુસેનાની આ પુષ્પ વર્ષાએ તેમના સેવા જુસ્સાને બુલંદ બનાવ્યો હતો. કોરોના સામેની જંગ લડી રહેલા તબીબી કર્માચારીઓ અને નર્સનો આભાર માનીએ તેટલો ઓછો છે. આવા સમયે ભારતીય વાયુસેનાએ સમગ્ર રાષ્ટ્ર વતી સૌ કોરોના વોરિયર્સનો વિશિષ્ટ આભાર માનીને તેઓનું મનોબળ વધાર્યું છે.
ભારતીય વાયુસેનાનું બેન્ડ અમદાવાદ સિવિલ પહોંચ્યું છે. ત્યાં સારે જહાં સે અચ્છા હિન્દુસ્તાન હમારાની ધૂન સાથે કોરોના વોરિયર્સને સલામી આપવામાં આવી છે. એરફોર્સના હેલિકોપ્ટર દ્વારા પુષ્પવર્ષા કરવામાં આવી છે.
અમદાવાદ આસપાસના વિસ્તારોમાં સવારે 10થી 12 વાગ્યાના ગાળામાં 50 કિમીના વિસ્તારમાં ડ્રોનનો ઉપયોગ ન કરવા અમદાવાદ એરપોર્ટ ઓથોરિટીએ રાજ્ય સરકારને આપી સૂચના છે.
